巴基斯坦女生可以爭取自己的下半生幸福嗎？ - 解開一對新人係咪自由戀愛嘅迷團
2019 年1月頭我在karachi參加了今次新娘表姐的婚禮，詳情可以重溫當時記下的:
https://www.facebook.com/227075223978040/posts/2243573662328176/
https://www.facebook.com/227075223978040/posts/2251487731536769/
特別記得新娘當時很怕醜地跟我説：「我將會好快訂婚，年底結婚到時你一定要來參加婚禮啊！我的婚禮係男女賓客同場的更加好玩！」（因為年頭我參加的婚禮係男女賓客分開，其實有點悶）她跟我説她將會結婚時仍然在讀大學中，我總是覺得奇怪點解佢哋咁急住結婚呢？書都未讀完！當時佢嘅表姐都係啱啱畢業就舉行婚禮！我連忙恭喜佢，表示盡量安排參加佢嘅婚禮，然後就好快到左年尾（現在）我已經在karachi參加左佢大部份嘅婚禮活動，好好玩好開心仲好攰潻！至於點解咁急要書都未讀完就結婚呢！據女主人説巴基斯坦人普遍認為人生苦短，今日唔知明日事，快點組織家庭擁有兒女享受家庭生活才是完美人生，就係咁佢哋係唔會理畢咗業未就結咗先算，男女主人好耐之前都係結完婚仲讀緊大學。
我記得果晚之後即刻周圍八卦佢究竟同邊個結婚啦，我走去問三兄弟好快就八到邊個係佢未婚夫😝二哥話：「佢未婚夫係我哋家族嘅人。」 我睜大雙眼問：「即係屋企人？」佢哋話：「係呀，不過有啲複雜咖！」佢哋越講我就越好奇又忍唔住笑：「同咩屋企人結婚！」「因為香港比較少人同屋企人結婚，唔通係表哥表妹咩？」佢哋三兄弟爭住講：「佢哋嘅關係係好難明白咖，準新郎係準新娘嘅媽媽嘅媽媽嘅細佬個仔，佢哋由細一齊玩到大咖！」我用左幾分鐘組織緊呢個親戚關係圖，然後我終於諗到究竟係咩關係哪 - 準新郎係準新娘個表舅父呀！因為我都有同一個親戚咖！ 我忍唔住笑同佢哋講：「我都有同樣關係嘅親戚咖！但係我從來無諗過同呢個人結婚咖！ 」然後我哋幾個又狂笑😝
原來故事嘅發展係佢哋兩個根本由細玩到大本身已經好熟悉大家，表舅父呢大過新娘五年左右，近呢幾年突然覺得自己鍾意左新娘，間中send 下短訊讚新娘你今晚好靚，有時又用電話關心下佢之類，到呀表舅父真係發現自己好鍾意新娘，於是話比佢自己媽媽知道，由佢媽媽向新娘媽媽提出不如佢哋結婚啦，新娘呢又本身對呢個表舅父有好感，兩家人又想親上加親就係咁答應左訂婚。
所以呢一對新人既係自由戀愛又係父母安排，真係有啲難以想像2019 年一個接近三十歲嘅男人會同自己媽媽講鍾意左一個女仔要媽媽向佢提親，喺香港仲有冇咁嘅事發生呢？
又假如今次新娘被父母安排婚姻的另有其人，但如果新娘唔鍾意嘅可以拒絕嗎？ 答案係可以咖！ 女方係可以拒絕唔喜歡嘅人，佢哋會有幾次出街機會，如果相處嘅過程覺得男方有奇怪嘅性格或令人反感之類係可以同父母講拒絕㗎，咁又當然要有真實嘅原因，唔可以每一次都拒絕。
咁會唔會有男人比人拒絕好多次呢？ 答案係有咖！我又從三兄弟度八卦到原來佢哋有個親戚四十幾歲先結到婚，後生時被人拒左好多次婚原因係性格暴躁，成日都鬧人所以好多女仔同佢去過幾次街之後就拒婚！
新娘的終身幸福可以自己決定嗎？其實有好多夫婦係自由戀愛嘅成功例子，我認識嘅包括係男女主人（佢哋嘅愛情故事好純真咖），新娘嘅父母都係自由戀愛，咁既然自由戀愛咁普遍又點解咁多父母仍然喜歡為自己嘅女大學都未畢業就搵定老公呢？據男主人解説，女仔從細到大就喺屋企好似公主一樣好多人保護（巴基斯坦公主論又係要另開一個topic去講）唔係好知道外面嘅世界，如果由佢自己揀男朋友係可以，但要揀一個真係可以照顧佢一世幸福以及經濟上完全可以無需令人擔心嘅嘅丈夫係完全無經驗，何不由父母安排一個已經有經濟能力及可以一世照顧佢嘅丈夫，咁個女仔咪唔駛行冤枉路！ 佢講完之後我又覺得好似有啲道理。（但男女主人明明都係自由戀愛）不過無論如何父母都係為子女好的。
男主人繼續講，巴基斯坦或者Muslim 社會都係以家庭為中心，一段婚姻並不只是屬於兩個人而係屬於兩個家庭，所以假如男女一方婚後有任何問題男女家的長輩都會有責任去共同解決，希望夫婦最終和睦共處直到永遠，由於要涉及家庭長輩，所以很多夫婦都會努力去做好自己，但首先丈夫一定要努力工作賺錢養家，這樣太太便可以毫無擔心的留在家中照顧家裡大小事情，最重要一定要生小朋友越多越好，巴基斯坦社會極喜歡把自己的家族無限擴大，總之女性婚後留在家裡打理妥當，生育及教導小朋友就是最好的，夫妻關係這樣肯定無問題。「咁巴基斯坦係咪好少因為有第三者離婚咖？」我又諗負面嘢！「全世界都有不好的男人或女人吧！但如果因為第三者而影響到夫婦關係是很大件事，你需要向所有長輩交待解釋，與其咁麻煩，不如好好愛錫老婆仔女，諗吓辦法怎樣給他們有更好的生活，一起去甚麼地方旅行吧！這就是家庭的力量！男人的終生責任！女人結婚前就係屋企嘅公主，結婚後就係皇后，屋企大小事都係太太決定，女人係家庭𥚃面非常重要的。」的而且確，男主人確實是一個好丈夫好爸爸，他知道她打理家庭辛苦就請幾個工人給她減輕家務工作量，那麼女主人就可以專心煮出不同款式美食比丈夫。所以女主人永遠小鳥依人持家有道，這對夫婦的關係結婚超過二十年依然很好令人羡慕。
「那麼也有女性婚後繼續工作吧？假如女生婚前是專業的醫生或律師，無理由因為結婚而放棄一切吧！很可惜呢！」我又忍唔住問到底！我總係唔信全巴基斯坦嘅女人都係無自己主意！男主人以佢朋友j為例子：「佢哋結婚前男女家有共識話女方婚後要繼續工作，只要雙方也同意女人可以出去工作的，但問題係佢同佢太太結婚咁多年只有一個女，婚後佢太太繼續在醫院工作，成日要輪班，屋企嘅事都係男人處理，佢太太放工回來好攰就瞓覺，雙方溝通機會極少，我睇佢哋感情麻麻，你見佢哋好少傾計吧！」我見過佢朋友幾次，諗諗下又好似係兩公婆無咩計傾，其實呢啲情況香港應該經常出現，香港好多人結婚後也要供樓，夫婦二人出去工作係極普遍嘅事，放工回家已經夜又何來有咩心情閒聊（現實好殘忍）
「咁既然生育小朋友咁重要，有冇女性會因為結婚後無得生（或男方無得生）而要離婚？」我越諗越多奇怪但又好現實嘅事。「也有D好舊思想嘅老爺奶奶要求佢個仔再同另一個女人結婚，比較新思想嘅會領養小朋友，也有生不到小朋友嘅女人會要求離婚收場！在巴基斯坦如果離婚一般好難再婚，而且要搬回娘家居住投靠，所以離婚不是一件好事，但現在她們也可以決定離婚，例如有打太太之類家暴事件，女方係可以提出離婚，不過這種情況很少。」
留在巴基斯坦越耐，同佢哋越傾越多，所以對於巴基斯坦婚姻睇法又越寫越多越講越遠。或者被父母安排的婚姻也是男女本身有的一種緣份，自由戀愛的也是另一種緣份，既然巴基斯坦這麼多夫婦也是被安排的婚姻也可以終愛到老，但為什麼今時今日在香港可以完全自由選擇結婚對象的夫婦離婚率卻越來越高呢？正如男主人説：「有時有得選擇或選擇太多也不是好事。」又如女主人說，婚後雙方對家庭及彼此的付出才是最重要維繫感情的原因。」旅行除咗睇多啲靚景之外，認識唔同嘅人瞭解更多文化都係令我不斷進步嘅其中一個原因。
我係度諗，如果讀緊書時我阿媽突然有一日同我講：「你將會嫁比阿邊個。」這件事對於我來講仍然非常之匪夷所思! 😂
再次衷心祝福一對新人永遠幸福快樂😊
下次和大家分享巴基斯坦公主論 ～究竟一個女人不用工作永遠受照顧係咪一件好事？
繼化妝美容之後今次長篇大論講婚姻，放心我仍然係寫旅遊的，只不過這些也是我認為值得分享給大家瞭解巴基斯坦文化的其中一部分。
《待續》
別忘了把Facebook專頁為"搶先看"（See first）以及"開啟通知"（Notification On）
較詳盡的更新在Facebook: indiapinkpink
濕濕碎碎的更新在Instagram：indiapink
Search